أشياء تعلمتها خلال 23 سنة







أول موضوع غاديا نشاركو معاكم و بالدارجة المغربية ، هاتسولوني علاش؟ هانقوليكم حيث هادا موضوع قريب مني بزاف و بغيت نوصلو ليكم بأقرب لهجة لينا كمغاربة.

غدا يوم عيد ميلادي 23 ، و قررت أنني فعوض ما نتغاضا على هاد الموضوع، علاش ما نحولوش لموضوع جديد نقدر كل عام نبدل ليه النطاق ديالو أولا نزيد عليه أفكار جديدة. 

اليوم هانشارك معاكم 23 حاجة تعلمتها على مدار هاد 23 عام كاملة، و بغيت نقولها ليكم لربما تلقاو نفسكم فشي حاجة و يكون عندنا قاسم مشترك أو تقدرو فقط تاخدو فكرة و نزيدو نتقربو من بعضيتنا أكثر .



1-  تعلمت نصبر على الرزق .
2-  تعلمت نتنازل أحيانا ماشي كدليل ضعف و لكن كبادرة مني باش نزيد نقوي علاقتي مع الناس لي كانبغيهم.
3- تعلمت أن واليديا هما ليكاينين، و هما ليوقفو معايا فواحد النهار ليمالقيت فيه حتى حد جنبي.
4- تعلمت المسؤولية فسن صغيرة.
5- تعلمت نعتامد على ربي و على نفسي، حيت هادشي ليدايم ليا.
6- تعلمت أن من حقي نبكي و نغوت و نبعد باش نعاود نلقى روح جديدة ليتخليني نعيش بطلاقة.
7- تعلمت عمري ما نحكم على انسان  أخر هي حيت يقدر يكون هو كايدير واحد الذنب لي أنا ماكانديروش.
8- تعلمت أن أحسن دواء هو نسجد لربي و نشكي ليه .
9- تعلمت أن الفشل كاين و هانعيشو و لكن النجاح لا بد ما نوصل ليه.
10- تعلمت كيفاش نتقاتل باش نبين للناس ليحكروني أن ليبغا يوصل لشي حاجة راه يوصل ليها.
11- تعلمت أن ماشي من الضروري كلشي يكون عندي، القناعة فبعض الأحيان كاتسوا بزاف .
12- تعلمت أنني نعزل الحاجة ليكانبغيها و نبرع فيها.
13- تعلمت أنني ندافع على أفكاري و ما نخلي حتى حد يفرض عليا الرأي ديالو.
14- تعلمت أن النجاح كانعيشوه من بعد مدة طويلة من العذاب، و لكن الحلاوة ديال النجاح و الله لاراها كاتستاحق كل دمعة نزلات.
15- تعلمت أن الصداقة ليست بالأبدية، بل توجد فقط لحظات صداقة.
16- تعلمت على أنني نضحك كل نهار واخا جميع الناس كايلاحظو أنني ضاحكة ديما و أن هاد الشيء ماشي مزيان فجميع الأوقات، و لكن أنا مصرة على أنني نضحك كل نهار.
17- تعلمت أنني "نطلقها تسرح" أو بعبارة أخرى " نخليها على مولانا".
18- تعلمت أنني نستمتع بحياتي حتى الاخر، نضحك ، نغني ، نقز ، نفرح ، نضحك حتى نبكي و ضرني كرشي، هاد اللحظات كلها هي ليكانبقاو عاقلين عليها.
19- تعلمت أن الانسان ليفقدتو  ( أو بالأحرى مات ) عمري مانساه و الجرح عمرو ما كايتجمع، و لكن ربي كايخفف على الواحد و الحاجة ليكاتصبرني هي أنني كانقول الجنة هاتجمعنا انشاء الله.
20- تعلمت أنني نتقرب من الدراري الصغار بزاف، بكل بساطة هما السر ديال السعادة ديالي فغالب الأحيان.
21- تعلمت نعبر على الحب ديالي لعائلتي بأبسط الالتفاتات .
22- تعلمت أن باش ترسم البسمة على وجه انسان يكفي أنك تهتم بيه شوية. 
23- تعلمت أن المغامرة ديالي لمدة ثلاثة سنين فعالم blogging هي من أحسن الحوايج ليقررت أنني نديرها فحياتي و ليفتحات ليا عقلي على شحال من حاجة و على شحال من مشروع هانشاركو معاكم على مدار السنين المقبلة. 

و حيت أنا انسانة و ما حدي عايشة مازال كانتعلم و مازال كل نهار كانطيح و نعاود نوض و حيت أنا ماشي مثالية من هادشي ليدكرت ليكم الفوق، غاديا نشارك معاكم واحد الحاجة ليمازال ماتعلمتها و لينتمنا العام الماجي ما تبقاش : أنا عصبية كثر من القياس، بزاف ديال الناس ماكايلاحضوهاش فيا حيت كانعرف نخبيها فمعظم الأحيان و لكن كاين الوقت ليحتى حاجة ماكاتبقى مخبية.


الموضوع ديالي انتهى، عيد ميلاد سعيد ماشي ليا و لكن لينا كاملين حيت كلكم هاتشاركو معايا هاد النهار.
أحبكم .




CONVERSATION

2 Comments:

  1. Joyeux anniversaire encore une fois,je te souhaite une vie pleine de joie,prosperité et amour 😊❤

    ReplyDelete
    Replies
    1. Merci beaucoup ma plume <3 je t'adore

      Delete

Back
to top